Novo književno izdanje poznate novinarke i publicistkinje Branke Bogavac „Susret je najveći dar“ biće predstavljeno u utorak, 29. oktobra, u sali DODEST u Podgorici, s početkom u 19 sati.
O knjizi će govoriti književnik Miraš Martinović, prof. dr Draško Došljak i prof. Zorica Joksimović. Moderator večeri je Amer Ramusović.
„Naslov knjige 'Susret je najveći dar' odnosi se najprije na moje susrete s velikim ljudima. Ljudi koje sam imala sreću da sretnem darivali su mi svoje riječi ‒ onako, za ljubav susreta, za ljudsku ljubav, za moju ljubav za njihove knjige i njihove riječi, jednostavno, poklonili su mi ih, a ja ih, s moje strane, prenosim svima onima koji vole da čitaju, koji vole knjige. Tako moj susret s tim ljudima postaje mjesto rasprostiranja njihovih riječi, mjesto odakle će one otići još dalje i stići do onih koji će ih primiti kao darove koji će ih obogatiti. I to rasprostiranje njihovih poklona je moje uzdarje za njihov dar. Naslov se takođe odnosi i na sve susrete s prijateljima kao i dobronamjernim ljudima za koje Drugi nešto znači. Ima li išta ljepše od susreta s čovjekom?“ navodi autorka.