Sara Tomić, učenica VIII razreda OŠ „Pavle Rovinski“ u Podgorici, dobila je specijalnu nagradu na Međunarodnom literarnom konkursu za najljepšu poeziju „Castello di Duino“ koje je održano u u Trstu, u kategoriji do 13 godina. Tema konkursa bila je „Imam jedan san“.
Sara je napisala pjesmu „I snovi su plavi u Mongoliji“, a njena nastavnica italijanskog jezika Angela Baturan prevela ju je na italijanski jezik pod nazivom „Veritiero“. Sari je nagrada uručena na svečanosti u Konferencijskom centru u Trstu, Piccola Fenice. Dodijeljeni su joj pehar, diploma, kao i knjiga sa poezijom mladih pjesnika. Posebno joj je značajno što je tamo upoznala mlade pjesnike iz Bosne i Hercegovine, Italije, Grčke, Pakistana, Rumunije....
„Sve je počelo time što je moja mentorka Angela Baturan spomenula da postoji konkurs za najljepšu poeziju Castello di Duino u Trstu, čija je tema ,,Ja imam san“. Par nas se zainteresovalo i bacilo na posao da napiše pjesmu. Nakon dosta razmišljanja, pala mi je na pamet ideja da napišem pjesmu o jednom malom dječaku koji živi u Mongoliji i o njegovim snovima o, za njega, nedostižnim stvarima. Nakon nekog vremena nastala je ova moja pjesma. Poslali smo je...“, izjavila je Sara nakon što se vratila iz Trsta, oduševljena prijemom i druženjem.
Ona ističe da nije očekivala nagradu zato je, kada joj je nastavnica javila da je dobila ovo priznanje, bila veoma uzbuđena i već je razmišljala kako će provesti dane u Trstu.
Tamo joj je bilo veoma lijepo, zato Sara talentima za poezuju poručuje: „Napišite po koji stih, iskustvo je predivno..."
U školi ističu da je Sara na ovaj način uspješno promovisala školu i državu na međunarodnoj sceni. Inače, OŠ „Pavle Rovinski“ svojim nastavnim i vannastavnim aktivnostima posvećuje veliku pažnju njegovanju talenata mladih ljudi i afirmaciji duhovnih vrijednosti, umjetnosti i kulture.
D. L.
